تيجو نساعد بعض فى تعلم اللغة الانجليزية

[English Woman]

السلام عليكم ورحمة الله وبركاته

اولا:انا اسمى ايمان من الاخر كده اللغة الانجليزية مربيالى الخفيف اه والله بجد نفسى اتكلم انجليزى كويس بطلاقه يعنى بس للاسف كل ما احاول افشل بصراحة نفسى قصير كل ما ابدا اسبوع والتانى واحبط فجات فى دماغى فكيرة طاب ليه انا مشجعشى ناس تانية تتعلم معايا انجلش من غير مندفع فلوس بالهبل ومن غير منمل وبكده نشجع بعض ويبقى فيه روح تنافسية بصراحه قلت اجرب واقولكم على الفكرة لو عجبتكو كان بها معجبتكوش مخصرتش حاجه اوك.

اى لغة لها اربع مهارات لازم تجيدهم عشان تجيد اللغة دى:

1.Reading القراءة
2.Writing الكتابة
3.Listening الاستماع
4.Speaking التحدث
صح كده ولا انا مترجماهم غلط ربنا يستر ههههه

المهم عشان نتعلم انجلش صح لازم نتعلم الاربع مهارات.والسؤال اللى بيطرح ويجمع نفسه هنا هو ازاااااااااااااى؟؟؟ازاى نقرا كويس ونفهم اللى بنقراه؟ ازاى نكتب كويس وكتابتنا تكون مفهومه؟ ازاى نسمع كويس ونفهم اللى بنسمعه؟ ازاى نتكلم صح ونوصل اللى جوانة بالانجلش صح؟ ازاااى ننمى كل مهارة؟

1.Reading: طبعا لازم نقرى كتير عارفين حتى بالعربى لو مش بنقرى كتير سرعتنا فى فهم اللى بنقراه ابطأ ماللى متعود يقرى.مثلا:انا بقرى(متضحكش انا اقرأ) جرايد كتير اخويا لا.لما بيجى يقرى مقاله بيطول عنى فى القراية مع اننا احنا الاتنين بنعرف نقرى.نفهم من كده ايه؟ عشان تعرف تقرى انجلش بسرعة وتقدر تفهمه لازم تقرى كتير, كتر قرايتك هتخليك تفهم الانجلش اسرع ونصيحه اققرى وانت ى
ساكته مش عشان متوجعيش دماغنا لا بجد فى دراسات اتعملت على ان القراءة الصامته بتجعل الانسان يفهم بسرعة لانه مركز فى حاجه واحده.طبعا لو عاوز تحفظ اللى بتقراه دى حاجه تانية احنا بنتكلم على قراءة شئ بالانجلش وفهمه بأسرع طريقة وده من خلال حاجتين القراية الكتير وكمان القراءة الصامته. وخلى بالك مش كل ما تقرى كلمه مش عارفها تروحلى للديكشنرى لا عندك قفشتك ابعد ايدك عن القاموس كده غلط لازم تتعلم ازاى تقرى وتفهم من خلال السياق وده الاهم لان لو واحد كلمك بالانجلش ولازم ترد عليه ومش عارف كلمه قلها هتقوله استنى بالله عليك هشوفها فالدكشنرى ويطلع لها معنيين تحتاس انت كده غلط لازم تتعلم المرونة وتحاول تخمن معنى الكلمات.

يبقى فهمنا من الرغى اللى فوق ده ايه:لتحسين مستوى قرائتك

1.اققرى كتير
2.قراءة صامته
3.حاول تخمن معنى الكلمات على قد ما تقدر

2.Writing: طبعا من خلال القراية هتتعلم ازاى تكتب وتكتب صح كمان احنا مش عاوزيين نكون شكسبير احنا ناس على قدنا عاوزيين نكتب جمل انجلش مفهومة مش كل ما نكتب حاجه يقولك وات دو يو ميين!!! تقوله ياعم والله دا الميين واضح جدا بس شكلك مبتفهمش هيلوغريفى!
المهم طبعا كتر قرايتنا هتعلمنا نكتب وازاى نركب جمل وكمان ممكن كل يوم نكتب اللى احنا عاوزينه هنا فى البيدج دى ومتتكسفش احنا اهبل منك فالانجلش.من خلال كتابتنا هنا فالبيدج هنتعلم ازاى نكتب صح


3.Listening:لازم نستمع للغة الانجليزية كتير والمقصود هنا مش اننا نسمع وخلاص لا نقصد نسمع ونفهم مشكلتنا اننا لما بنسمع انجلش بنحس ان بالتأكيد الناس دى بتهظر اتكلم براحه ياعم وتحس ان ودانك هتنط منك عشان تفهم حاجه بالرغم من ان الكلام ده لو اتكتب هتفهمه يبقى الغلط فين الغلط فى انك مدربتش مخك علشان يسمع الانجلش. علطول بتقرى كلام مكتوب والسلام فالمهم اننا نسمع لانجلش كتير ونحاول نفهمه على قد منقدر لحد ما نتعود ان شاء الله.

4.Speaking: وهو ده ناتج طبعا كل المهارات التلاته اللى فوق لو اتعلمنا نقرى كتير ونسمع كتير هيجى يوم علينا ان شاء الله وننطق اه والله بتحصل الامل فى ربنا كبير.مفكرنى او مفكرانى بهظر لا والله طاب الطفل بيتعلم ازاى من كتر مسمع بيبدأ يقلد لحد ميبقى لبلب فالكلام ونسكته منعرفش.فكتر سماعك وترديدك للكلام هيخليك لبلب ان شاء الله وبعدين لازم تتكلم مع نفسك بالانجلش كتير متعبطش ولا حاجه اعتبر ان نفسك دى خواجه وملهاش فالارابيك خالص حاول بقى تكلمها يا معلم وورينى ان فهمت منك حاجه ههه.



طاب هتقولى دالوقت احنا هنعمل ايه يا ست الرغاية متقصرى وتجيبى مالاخر
هقصر اهه براحه متزعقش بص يا سيدى:
1.فى حاجة اسمها BBBC Learning English دى طبعا ملفات صوت بتصدرها البى بى سى عشان تعلم الخايبيين زىى الانجلش دى عبارة عن ملفات صوت mp3+ ملفات pdf لملفات الصوت دى. هنسمع الملفات دى لمدة اسبوع ونتعلم الكلمات الجديدة اللى فى كل موضوع وخلى بالك لازم نسمع كل ملف صوت حوالى 30 مرة خلال الاسبوع ليه بقى عشان ينحفر جواك زى ما بيحصل مع الطفل يعنى كأنك بتحفظه وبكده هتفهمه وهتستوعب الكلمات اللى فيه وكمان لما تتحط فى موقف يستدعى استدعاء المعلومة اللى اتعلمتها هتستدعيها بسرعة لانك اتشربتها خلاص لو معرفتش اسمحلى اققولك انك...ولا بلاش انت هتعرف لوحدك.والكلمات الجديدة فى كل موضوع نطلعها فى كراسة كده ومنحفظهاش منفرده لا دى تبقى اكبر غلطة لتعلم الكلمات هو احنا بنتكلم كلمات متبعترة كده وخلاص لا طبعا لازم تكون فى جملة وبالتالى لازم تكون كل كلمة فى جمله عشان تعرف ايه السياق اللى بتتحط فيه
ومن خلال الملفات دى هنتعلم ازاى نسمع وهنقرى اللى بنسمعه ومرة فى مرة هنبيتدى نسمع ونفهم بسرعة والله الموفق والمستعان.

2.نقرى كل يوم مالا يقل عن 20 صفحة من اى رواية او قصة ونتجمع هنا ونقرر ايه هيه انا بقترح تكون Pride and Prejudice مش عجباكو نغيرها.وناقش اللى قرناه كل يوم هنا فالبيدج.واللى عاوز يكتب جمله عجبته موقف عجبه جمله وهكذا وبكده نتعلم ازاى نقرى ونمى مهارة القراءة

3.نجيب رواية زى مثلا Harry Potter ونجيب ال audio book ليها يعنى ملف الصوت بتاعها تبقى قدمنا كتابة وصوت ونسمع فصل كل اسبوع نسمع الفصل 30 مرة لمدة اسبوع كل يوم 3-4 مرات نسمع الفصل وبكده هنمى مهارة الاستماع وكتر الاستماع ليه هيعلمنا تعبيرات وكلمات جديدة


من الاخر هنعمل الاتى بعد كل الرغى ده

1.bbc course: نسمع كل اوديو كتير جدا +حفظ كلمات( كل موضوع) فى جمل طبعا

2.قراءة رواية او قصة قراءة حوالى 20 صفحة يوميا ولتكن pride and prejudice

3.قصة او رواية +الرواية بالصوت اى الرواية والاوديو الصوتى لها حد بيقرى وانت بتسمع ونسمعها اكتر من مرة


لو حبيتو تدخلو معايا نتحدى اللغة الانجليزية ونتعلمها ونجرب اوك هبقى سعيده جدا انشله لو عضو واحد او عضوة اللى اشترك
اعتقد هتبقى تجربه حلوه اننا نتعلم سوا ونتناقش هنا فى اللى ذاكرناه ونشجع بعض ونرشد بعض
لو معجبتكوش الفكرة قلولى ولو فيه مقترحات تانية يا ريت تقولوهالى
مستنية ردودكم
سلااااااااااااام